Кыл

Тулыс гуждор усьтиськем бере эшъёсыным Зеслан гурезе поталлям. Нырысети классэ ветлыкум, огаз озьы шутэтскон нуналэ мон эшъёсыз пояй 120 кыл минутаз лыдзисько шуыса. Нокыче но ой кариськы…Жоген куартолэзь но вуиз, зеч дышетскись одноклассникъёсме каникулэ келязы, нош мон кадь лябъёссэ дышетскыны кельтизы на.
Шонерзэ ке верано, мон туж ляб лыдзиськи. Али кадь ик тодам- озьы но тазьы тыршыса 33 кыл минутаз люкаськылиз. Кышъет, чушъял, аръян – могаса удмурт кылын лыдзи… Верантэм секыт вал со мон понна. Солэсь но секыт луиз эшъёсыз пояме. «Тон али но-а каникулэ од поты?»- юаллязы мынэсьтым. Мар меда соослы мон вералляй, тодам овол ни… Мукет предметъёсты зеч дышетэмен гинэ монэ нырысети классэ эшшо огпол оз кельтэ, дыр…Озьыен, удмурт кылэн курадзон мынам «Букварь»-ысен кутскиз.
3 классэ дышетскыны потэм бере, атае доры мукет гуртэ улыны выжимы. Атай мыным вераз: дневникад одиг ньыль но, пе, медаз луы. Луиз ке нош- чужанае доры куное каникул дыръя уз ни келя…Нош мон одиг малпанэн гинэ ули — ку меда мон чужатай юртам берто, ку аслэсьтым эшъёсме нош ик адзо…Балтачын мынам нырысь вакытэ шудыны эшъёсы но ой вал. Быдэс нуналъёсын висъет сьорын огнам пуки. Атаелэн быдэсак книгаосын тырмемын бадзым канаез вань вал. Уж оволэн мон соосты нунал чоже лыдзыса пуки. Огшоры уг верало вылэм, книга лыдзыса зэм ик кыл воля! Балтач одноклассникъёс полын мон самой трос кыл лыдзись луи…Шумпоти ук, шумпоти! Мед, пе, вылэм, калмияр эшъёсы тае адзысалзы…Но жаляса верано, книгаос лыдзыса но мон шонер гожъяськонэн таки ой эшъяськы. Каникулэ потыкум дневникам котьку но одиг 4 вортти! Урамти бордыса бертыли. Ас поннам весь малпаськыли, кинлы меда кулэ воксе та удмурт кыл шуса? Малпалляй, буди ке городэ кошко, зуч луо, шуыса. Удмурт кыл понна чужанае доры монэ оз лэзьылэ… «Мар удмурт кыл меда ини со, мынам но со урокъя котьку 4 потылиз.»- куддыр жаля вал монэ атай. «Кызьы,пе, удмурт кылын янгышъёс лэсьтылод?»- паймылиз мама…
Пумтэм-йылтэм ик вал со ваньмыз. Уго арняяз удмурт кылэз куинь пол дышетылим. Зол-зол тыршыса гинэ куддыр кылъя 5 басьтыли ик. Нош литература урокъёсын мыным каньыл вал: весь лыдзиськы, произведениосъя ас малпанъёстэ вера …
Бадзым будэмъя валаны кутски: отметка понна дышетсконо овол…Чапак соку ик удмурт кылме но яратыны кутски, мед ньылъёс гинэ ке но бичай, мед туж трос янгышъёс но лэсьтыли…
9 классын милям классэн кивалтисьмы воштиськиз. Удмурт кылъя дышетисьмы Зинаида Тимерьяновна луиз. «Наташа, д,з,л,н,с,т бере гинэ э гожтиське!» -верамез али но пель сьорам. Зинаида Тимерьяновна урокъёс бере но монэным ужалляз: солэн чектэмезъя мон нырысьсэ лыдзи «Кенешез» но «Удмурт Дуннез», Эрик Батуевлэн ужъёсыныз тодматски, Удмурт шаер сярысь трос выльзэ тоди. Мон синмаськи удмурт кыллы! Дышетиселы тау!
Школаме йылпумъяса городэ кошки. Ой, мон ой луы зуч. Сыче малпанъёсы но азьло ик йырысьтым пурзизы! Ас кылме, анай кылме гажась огшоры удмурт кышномурт луи.

Мамаелы…

Мамаеным

Мамаеным

Изен азьын котьку но Мамае монэ вешалляз, яратылиз: «Пичи кизилие тон мынам, пичи сяськае, пичи шундые, пичи кочышпие…» Одигаз сыче нуналэмон, пе, кема волдэт шоры долкаса ули. Анае паймыса ик юам мар монэн луиз шуыса. «Мама, пожалуйста, пичи Лампочка вера монэ» куриськем. Со али ке но мыняса вера та учырез.

***
Мама монэ 2-ти курсын дышетскыкуз вордэм. Одиг толэзьзэ бордам улэм но Иже берен кошкем. Чужай сое оскытэм, монэ ачиз утез-вордоз шуыса…Кызьы дырыз луэм анае дорам вуылэм. Бертэ, пе, вал трос кузьымъёсын. Нош мон сое апай шуыса кожалляй. Возаз мыныса саламзэ, пе, аслым басьтисько но чужанае доры пегзисько вал. Коня Мамае бордылиз, дыр…Чужанаен умме усем бере, возаз поныса нуныям- яратэм. Ку на эшшо? Колыкум нуныян понна коня иськемъёс ортчоно луиз Мамаелы.

***
Аслэсьтым атайме 10 арес дыръям мон адзи. Ми Оля эшеным азбараз шудыса улимы, вуиз Олись чужапае но вераз Мама, пе, бертыны косиз. Мынам пичи сюлмы малы ке но шодиз туннэ атайме адзо шуыса. Капка азьын сылэ вал вож «Мосвкич». Мон дисьтытэк каллен гинэ корказьти доре пыри. Нырысьсэ аслэсьтым папаме адзи. Мон кожасько вал со тушо пурысьтам песятай. Шляпаен, тодьы халатэн ) Паймод, ява, мынам пумитам потиз воксе мукет агаймурт. «Мон тынад папаед, нылы. Табере асьмеос чошен улом»- вераз мыным. Мынам сюлмы зол- зол йыгаськиз, мон валай туннэ нуналысен мынам мукет улоны кутскоз. Папа трос пол гуртамы вуылиз та нуналлэсь азьло. «Юыса эн вуылы татчы, нылдэ ке адземед потэ!»- вожез потылиз чужатайлэн. Нош мон пинал туж кышкай соин пумиськыны, вуыкуз я шкаф пушкы, я кровать улэ ватскыли. Нош мамае весь возьмаз папаме. Коня солы куректон ке но ваиз, коня вылтиз ултияськиз ке но. Монэ, аслэсьтыз пиналзэ кулэ оз кары, Мамаме огназэ пиналэн кельтиз. Мамае папалэсь открыткаоссэ, туспуктэмъёссэ лушкемен возиз, коня пол мыным адзытыны выре вал, мон синме зол-зол ворсалляй, пумиськонлэсь курдай…10 ар чоже мамае аслыз пар но утчаны оз выры, весь возьмаз, оскиз, вылды, мынам аслам атае луыны кулэ шуыса. Со али ке но папаез шузимыса яратэ…

***
Дорамы куное кышномуртъёс вуо ке кутско вал ни вормыны турттыса нылпиоссэс ушъяны. Огезлэн,пе, пиналыз зеч дышетске, огезлэн нянь ачиз пыже, муетызлэн нош быдэс корказэ ачиз утялтэ…Мамае нош мон сярысь ноку пал кыл но оз поттылы. Огпол бордон кале вуи. Малы шуисько монэ ноку но зечен уд вераськы, мон оломае но быгатисько ук? Школаын анай-атай люкаськониос бере но Мама шыпыт улиз. «Мар, мар шуизы?»- юасько. «Номыр, мукетъёс зечгес дышетско,пе» – пумитам мадьылиз. Чуказеяз эшъёсылэсь гинэ тодыли мон сярысь дышетись трос умойзэ верам шуыса)
Юнме кыллы уг быры Мамае. Улон ваньзэ возьматоз. Чипуосты сизьыл лыдъяло.

***
Айноез вордэм бере Мамаелы туспуктэмъёссэ келяй. «Мучи,( мусояса монэ али ке но озьы нима) тон тус пичи! Ачид вордскем берад быдэс таче ик вал: синъёсыд но, ныръёсыд но…» Со али ке тодэ на кыче тусэн мон вордиськи!

***
Италмас туннэ мынам Анаелы нырысьсэ вераз « Мамощки, библю тибя!» Мамаелэн туннэ вордиськем нуналыз. Самой чебер, дуно, сабырлы, зибыт, ненег, валась, оскись, яратись адямиелэн. Тон ке дисьтись адями од луысалэд, мон ноку ой вордиськысал та дуннее! Тон ке од оскысалэд, мынам ноку оз луысал аслам атае. Тон зэмос кышномурт ке од луысалэд мыным Инмар оз кузьмасал самой зеч вынме! Тынад визедлы но чебередлы котькудиз пайме! Мон тыршо тон кадь зэмос чылкыт Кышномурт луыны!
Мамае, тон мынам бадзым Лампочкае, кудиз пиштэ-югдытэ улонме!

Сюлмам сизьыл

Гужем быриз. Инкуазьын сӥзьыл кузёяськиз. Гужем пӧсен шунам музъемез кален-каллен толъёс кынто. Горд-ӵуж куаръёс ненег гинэ куасьмем турын вылэ усё. Лыз инбамез сьӧдалэс пилемъёс вошто. Берпуметӥ шунды сиос пишто ке но уг шунто ни. Азяд шуныт шокчемед пичи буслы пӧрме. Омыр мугорез юзыр каре. Тон келяськиськод шуныт каузьёсын. Ваньмыз воштӥське… Читать полностью »

Лу возам

Ми тодматскимы нырысети курсын: чиган порма нылаш, кудиз мукетъёс полын валантэм ассэ возиз, мукет сямен дисяськиз, мукет удмурт кылын вераськиз. Тани пыре эшшо ик бере кыльыса парае но вань аудитория пыр мынэ дышетисьлэн жокез доры…Эсьмаса, каблукез зол йыггетэ… «Кез- страна чудес!»- серкъяло вал папаен мамаос… Шонер веран. Жуась гордань, ымдуръёсыз низьыли кадь векчи, синъёсыз бакалэн кадь зок…Мон со шоры туж шер учкыли, вань ке вань…

2 курсэ выжжемы бере, эшмылэн вордиськем нуналаз Венья гуртэ вуылимы ) Зеч шулдыръяським-кунояським, берло ваньмы чошен клубазы вамыштимы. Мон эктыса жади но палэнэ кариськи…Возам Ксюша но султиз…Одиг кыл борсьы мукетыз…Та нуалысен ми валче кыл шедьтимы…Та нуналысен мон синмаськи Ксюшалы. Нокыче кылъёсын верантэм ик. Луэ, ук, адями борды тонэ кыске…Пумиськонъёс соин возьмаськод, котькуд лэсьтоно вамышсэ солэсь шодыса улиськод, нокинлы мукет валантэм сяин яратиськод адямиез. Мон уг быгаты али тае ваньзэ валэктыны. Кыске монэ Ксюша борды, сузэре кадь со мыным йотэ, мынам сюлмы шуг куке со сютэм, куке солэсь диськутэз векчи, куке со ожыт колэ.
Вуэ но тани со дорам куное и кутске ни аслаз мудрон кылъёсыныз мыным мадьыны. Осто, мон ведь со порма визьмозэ солэсь гинэ нырысьсэ кылисько. Мон яратисько сое кылзыны, дугдылытэк кылзыны. Со трос тодэ, тодэмез потэ, улонэзлэсь одиг нуналзэ но огшоры юнме быдтэмез уг поты. Куддыр мон сое вожасько. Яратыса вожасько…Ул, пе, вал нуналзэ ми возын. Тон мыным кулэ, Ксюша. Омыр кадь. Ми соин сыче портэмесь так то…Мон лап-лап Анаймурт, со нош Кеч, Чимали со, ассэ та улонысь утча на. Мыным со сяна нокин но яратисько тонэ шуыса шара кылъёс уг вера. Тодиськоды-а кыче мугорти кезьыт кошке, мон сылисько долкаса, мар меда вералом пумитаз…Мон кышкасько тани та огдыре ваньмыз ышоз шуыса! Уг яра озьы! Уг яра ! Уг яра озьы адямиез пушкад, сюлмад сыче мур пыртыны…
Куартолэзе кылем аре Ксюша ышиз. Ышиз адями: телефонэз кысэмын, нокин номае уг тоды. Мон аслым инты ой шедьты, визьтэмми. Куинети нуналаз потиз вотэсын. Мон трос шораз черекъяй. Со оз малпа мон ышто шуыса, эгоист…Кулэ меда вал со мыным мар ке валэктыны? Кин меда мон солы?

Эше

Эше


Дугдимы адзиськемысь, вераськемысь… Нырысь секыт вал, котькуд нунал вуэмзэ возьмай. Туннэ ке оз ву, мед кошкоз малпалляй. Вордиськем нуналам но оз ву. Айноен секытэн луэмме кыче солы мадеме потэ вал, мед, пе, вал монэн чош шумпотоз…Оз ву Кирос нылызлэн нуалаз но …Возьмамы…
Ар ортчиз тани кызьы ми нош соин пумиськимы. Дораз вамыштыку сюлмы сыче верантэм зол йыгаськиз… Кема дыши нош бордаз луыны. Оскыны.
Тросэзлы валантэм Чимали. Чеберай, самой дуно эше, туннэ нырысьсэ мон тыныд верало кыче мон тонэ зол яратисько! Лу возам, котьку лу возам, кыдекын а тон, матын а…Чида монэ, таче шузи эштэ…

Кечпие сярысь

Тани туннэ чукна шузи кылисько ни вал: ческыт вотъёс адзыса изен сяин, ымнырам кин ке но шуак гинэ шуккиз. Тэтчыса султи! Учкисько: Айно возам пуке шудонэн кокаса. Сыче со мынам сэзь пинал. Мон валесын костаськон сямен жадиз ни нылы, изен дэрем улысь ноныме ури-бери ымаз донгиз но пичи кунян кадь тяпкетыса утыр колэ ни. Тани изиз пичие. Мамаё-мамаё( тазьы ми палан верало) киоссэ чошен поныса, бугор сямен изе. Сыче ческыт зын бордысьтыз лыктэ. Йол зын. Йырыз борды выди но улисько зынъяса… Малпаськоды, Инкуазь огшоры-а пичильтыкъёсты таче мусоен кылдытэ? Пиналмес мед адзыса синмаськомы шуэ со, йонтэм анай но нунызэ адзыса кулэ мед кароз, вунэтыны медаз быгаты та пичи йыроксэ. Кулэ мед луоз анаезлы но атаезлы, асьсэлэсь комоксэс мед утезы шуыса со ваньмыз…
Тани Айное но кыче мусо пинал мон понна, уката ик изьыкуз 😉 Султэ ке йонтэмаськеменыз йырти чын ик куддыръя потэ, ява ) Нуналысь нуналэ мукетгес луэ…Уйессы изиськом, соиз понна тау…Быдэс нунал ведь тырше, одиг минутсэ но ял карыны уг вала. Весь кытчы, дыр, мынэ, мае ке но шедьтэ, мае ке но ишкалтэ, ымаз донге. Учкыса гинэ вутты…Уката ачиз но яратэ куке весь возаз пукиськом. Кожасько вал вань пиналъёс Италмас кадь луо…Со ведь мынам бордонлэсь мазэ уг вала али ке но, огназ шудэ, ассэ бадзым адями сямен возе. Зечоке, одиг кылын вераса) Айное нош сыче нылашъёс кадь: акылес кечпи, куатапуйы) Ваньзэ мамаезлы но папаезлы возьматса ужано! Молодеч шуысал ини Айное интые ассэ Италмас. Кылсярысь, Италмас Айноез возын пичияк шыпыт
шудыны но уг быгаты: Кечпи, вуэ чаляк возаз но йырсизэ кыска…Али ик апайзэ бордытэ ук! Йонтэм весь нылмес нимаськом. Кораблез кызьы нимазы, озьы ик со вуын пе уялоз шуо ук! Ма,мед, мед сезь пинал луоз!

Апаез садике «ужаны» ке кошке, вань хозяйство Айно вылэ кыле, ваньзэ мае потэ аслыд карыны яра, басьтыны, шудыны. Озьы ке но, куке адзе осэти апаез пыре -шумпотыса кытчы пырон пась уг шедьты, черектиське! Мозме ведь пичильток апаезлэсь.

Будэмзыя-азинтскемзыя ке чошатид Пичи Пилемен Пичи Шундыме: Айнолэн кузьдала-секталаез но апаезлэсь бадзымгес та дырлы, пиньыз но туж вазь потиз, ньыль пыд но чаляк шедьтиз, али кадь боддор кузя Италмас бер гинэ ветлыны дышиз ай. Вань ук солы кинлэсь адзем карыны!Кыче зеч куке бадзым апай вань:ваньзэ шори люкыны, эшъяськыны, выльзэ чошен тодыны луэ.Мон ачим пичи дыръя ик та сярысь малпаськи, мед, пе, вал, мынам нуныосы одиг аресъем луозы !

Вадьсан: Айномы йонтэмзэ роддомын ик возьматиз. Тани али гинэ изьыто нылме, курадзыса стена кузэ пыласькын мыно, нош со кыти-мати сайкам ини- быдэс роддоме бордэ! Коня ми нырысети нуналъёссэ курадзим ноныны …Куаляй ик вал ни ноныны уг малпа шуыса, нош собере кален-кален дышиз…Кечпие!

Пичи Шунды

Пичи Шунды

Роддом бере

Роддом бере


Туспуктэмъёс понна Ксения Чималилы тау )

Бурдо Анай

Айное сюлэм улам каръяськем шуыса, мон гуртын тоди. Балтаче турын ужаны Италмасэн кыкнамы бертимы, куазь туж пось возькиз, ми нош быдэс нуналъёсын шунды улын пыжытозь ик ужамы. Одигаз жытазе мыным шуак малы ке но туж урод луиз, сюлмы ик шузимем кадь йыгаськыны кутскиз. «Мар ке но монэным, оло, висьны усисько ни,» — малпай ас поннам. «Ма лэсьты ук тест, пияно, дыр, тон!» — мынэсьтым жожтиськемме кылыса серекъяз Рома.

Тест кык гож возьматиз. Нырысь ик кинлы мон верай та иворез, луиз мамае. Мамае мынь гинэ потиз, мынам пушкам сыче шуныт луиз мамаелэсь синъёссэ адзыса, соос сыче мусояса-яратыса шорам учкизы, палкыл вератэк но мон валай — мамаме кык полэс шудогез кари. Италмасэн мон так и ой дисьты солы вераны пияно шуыса, со монэ адзиз ини бадзым котэн. Возьыт али мыным, чик аслам адямие кадь ой кары сое, ой оскиськы аслам анаелы, кышкай, шузи пинал. Мар уродзэ меда со мыным верасал, ведь таче ик шудо синъёсыныз монэ зыгыртысал но чупасал.

Турын ужъёсыз йылпумъям бере, городэ вуимы. Вордиськем нуналэ коня ке нуналскын вуыны кулэ ни вал. Рома Кубисталэсь дэремзэ мыным кузьым басьтыса милемды пумитаз. Шумпоттиз ук монэ ) Син азям на, кызьы мон дэремме дисяса бубыли сямен поръяй синучкон шорын, кыкети бурды чогиськиз ук! Рома, конешно, самой лоптэмын вал. Ужамез пичи но оз поты ни, кыче но пичияк отпуск аслыз лэсьтиз. Кузонэ билетъёс басьтимы вордскем нунуалэ мыныны, но жаляса верано, ми так и ом вуэ отчы ветлыса… Вордиськем нуналы но гань-гань гинэ асьме понна ортчиз …

Нунал ортчыса вуизы тужгес но секыт нуналъёс, коня мон курадзи… Италмасэн номыр тачеез ой вал, нош табере нокыче зынэз ик кылэме уг луы ни, одиг гинэ малпан сиен сярысь вань пушме берлань поттэ вал. Пукем уг луы, изем уг луы, вераськем уг луы, жади. Уката, Италмас тубе но гадьме ноныны кутске. Кудддыр, сыче нылме бордысь улляме потэ вал, кельты монэ, пе, огнаме… Нокинэ адземе но уг поты! Озьы толэзь пала курадзи. Мар йонтэм пинал меда пушкам пуке ини, малпалляй. Пи, дыр, отын, серекъякязы. Мон тоди ук, тоди, нылы, Айное со пушкам, пичи лякем пытьые мынам… Йонтэм кечпие пушкам…
«Мар со сыче, дугды бадзымзэ нонтэмысь», — вераз враче, — «Огзэ жаляськод- мукетыз нош мар сиез?» Мыным Италмас ялан жаль потэ на вал, кожалляй 2 аресозь пиналме йолыным сюдо, Италмаслы аресэн жыны гинэ тани луиз ай. Собере асме кызьы ке но кути но, ой ни сеты гадьме, нош солы со чик кулэ но вылымтэ ини, огпол но оз кур ни со дырысен. Валаз, дыр, визьмолюке. Сузэрзэ жаляз, дыр.
Куартолэзе ми асьме патерамы улыны выжимы. Тодиськоды-а, кыче со зеч куке пиналъёсыдлэн асьсэ липет улын сэрегзы ке вань… Луысалмы ке ми Ромаен гинэ, нокыче корка но, патер но кулэ ой луысал. Яратоно адямиен шалашын но, зеч, шуо ук зучъёс… Пиналэз вешаса гинэ уд сюды-ворды…

Ваньмыз выль сямен вал таиз пиналэным… Коты но туж кема оз шодскы. Пи, дыр, пи, возьмазы ваньзы. Куатети толэзяз собере шуак будиз. Узие огнам ветли. Врач чабкиськиз: Мар шаплы нылаш та?
Италмас нуныяз котме, пичиез отын улэ валэктимы ми, яратэ со тонэ, адземез потэ ини апайзэ… Выдыса улыкум весь возам вал Италмас, кызьы меда мынам яратонэ Айнолы но шедез? — весь малпаськи мон… Италмасэз кадь яратыны быгато на меда?

Яратыны луэ вылэм… Сыче ик зол, верантэм зол. Яратоно нылашъёсы монэ, анайзэс кыкнапалти бурдъязы, кужымен узырмытизы…Кызьы меда ми али соостэк улысалмы?

Рома, тау! мон самой шудо Кышномурт!

Инмар, тау! мон самой шудо Анаймурт!

P.s. Туспуктэмез Григорий Степановлэн.

Малы Италмас?

UbuZfHSbPqs

Италмасэн секыто дыръя ми шузимыса пи возьмамы. Куке нырысьсэ нылмы сярысь тодимы, Ромалэн мылкыдыз ик куашказ, оз оскы верамелы. Нош собере жыт уж дурысьтыз бертиз но шумпотыса вераз, нылъёс, пе, атайзэс золгес ярато. Италмасэ но атаезлэн нылыз, пе, луоз… Та ивор бере мынам ымы зол усьтиськиз. Кыче ним? Италмас? Таиз мар ке но вылез вал кадь… Со сыче шуак вал, возьмамтэ шорысь, кыче ке кыскисез но вал та бордын, кышкатисез но. Мон малпасько вал пичи Люба милям луоз шуыса. Калыклэн сямен ваньмыз. «Люба ке уг яра, ойдо  Александра, Алена нималом?» — юай Ромалэсь. Нош Рома ваньзэ соку ик аспонназ валам ни вал… Берлогес дыды возьмаммес тодэм беразы,  Алнашын Лана (Светлана нимысь, вылды потэмын) но Татышлыын Агата (мамие асме озьы ниман турттэ вылэм) ниманы чектизы.

Италмаслы ваньзы пумит луизы: «Мар ти татчы малпады, нунымес шудтэм карыны турттиськоды, дыр… Садикын но, школаын но серекъялозы… Будиз ке ачиз ик нимзэ воштоз… Паспортной жокын тиледыз нокин озьы ниманы уз лэзьы… Мар ти вералоды пиналды будиз ке?.. Йырды кошкем ни кадь… Италмас поэмаын но нылаш кыче шудтэм. Шуд уз вай та ним…»

Тачезэ ми котькудизлэсь ик кылимы. Мон  курадзи озьы веракузы. Кытын ке но пушкам оски, Рома учкоз на выль сямен та югдур шоры, аслэсьтыз малпанзэ воштоз шуыса. Озьы ик, йырам малпанъёс но берганы кутскизы: малы ми ваньзы сямен одиг толъя ик лобыны кулэ?  Паймыса, Атамановлэсь удмурт нимъёсын книгазэ но учкылыны доре ворттимы. Жаляса верано, асьмелы тупасьсэ отысь ом синйылтэ. Ромалы чекти жребий куштыны. Куштом ке куштом, пе, мон ас сямен нимало. Александра, Агата, Люба, Алена но Италмас гожтимы. Ачим ик кыски пусъёсты но потти Италмасэз! Ох, кыче Рома шумпотиз, учкы, мон верай ук, Инмар даже монэн соглаш!

Кызьы меда озьы луыны быгатоз, аслам киыным 5 ним полысь удмуртсэ кыски? Ваньмыз пормиз кызьы кулэ. Соку мон, шонерзэ ке верано, асме жаляса пичиме  Иточка нимало шуыса ули…

Вордиськемез бере Италмасмылы Иточкаен вазьыли. «Как? Риточка?» — юаллязы мынэсьтым. Италмас, мултэс валэктонтэк вералляй пумитазы. «Иточка овол со» — вожез потэ вал Ромалэн, — «Италмас мынам нылы. Шуш эн кары сыче нимез!» Италмас шуыны мыным эшшо ог-кык толэзь кулэ на вылэм. Али валасько ини нокыче со Иточка но, Ита но овол… Вормонтэм но верантэм шодон куке ваньзы берыктисько Италмаслы вазиськыкум. Нош мон быдэс ымтросам ик Италмас шуисько! Нылылылэн туж аспортэмлыко нимыз. Ма, ачиз но со мынам огшоры нылаш овол ук. Сыче нимен со одно удмурт йоно адями луоз! Кызьы меда сое мукет сямен ниман луысал на?  Италмас гинэ!

Пинал вордиськем дырысен самой тузиез, куке адямиос асьсэ пиналзылы  кыче ке мексиканской сериалысь  ним поно но милям Италмас ним вылти серекъяло… Зэмзэ ке верано, милемлы но тиляд порма нимтулъёс сюлмамы уггес ик пыро.))) Мар паймонэз милям ниммылы? Дышимы ини  нокинлы номыр валэктытэк… Милемыз ваньзы кожало бигер, паймод я. Ма удмуртъёслэн асьсэ нимъёссы луыны уг быгато шат?  Со овол нокыче шоу, со овол ваньмыз кыче пиар понна (озьы ведь тросэз малпало)… Кызьы луэ нылпи вылын кыче ке пиар карыны? Пинал яратонлэсь вордиське, пиналэз бурд улын будэто, нуныяса, уродэзлэсь утьыса, пинал арбери овол, соин кышетэн сяин уг лу сэзъяса ушъяськыны. Котькудиз аслыз тупась ним шедьтэ. Мед луоз со котькыче ним, кудиз асьтэлы яраське. Тилелды  кельше ке ми но туж-туж шумпотомы )

Нош ми оскиськом, Италмасъёс, Эрикъёс, Азаматъёс арысь аре тросгес но тросгес луозы. Уката ик выльгес нимъёс мед вал. Мон возьмасько та дырез пось табанез сямен. Ми кыдам семья. Кыче ке серекъям вылады ми азьло ик  сялзимы. Тиледыз гинэ жаль, адямиос, кудъёсыз вань кулэзэ но дунозэ милям лэсьтэм вамышмылэсь уг валало.

Ватсан: Нокинлэсь вожзэ поттэме уг поты!

Италмас Пичи Пилем

Италмасмы
Малы юалоды Италмасмы Пичи Пилем? Кирос мамиез вордскем бераз ик солы сыче ним сетиз, озьыен со дырысен Италмас борды Пилем «лякиськиз». Мон трос пол пуктыли ини синазям чагыр инбамез, нош отын мусо чуньы пормаен мынам Пилеме лоба. Со овол куазьзорез ваись пилем. Овол. Тодады ваиськоды, дыр, ук чушъялэн гондырпи сярысь учкем мультфильмез, кудъёсыз мусо тодьы изнесо пилем-валъёс вылын ворттылизы? Италмасэ чапак сыче ик. Учкисько шораз но шумпотисько- туннэ куазь шулдыр луоз, тани возаз Шундые, сюлмам но шулдыр гур чузъяське, котырак но ваньмыз зеч, толалтэ но шуныт таче Пилемен. Малпаськисько- малпаськисько но валэмысь дугдисько…Кытын со Пилем улэ? Инбамын овол ук со ! Пушкам! Дораз лыктисько, жиптисько бордам но нокытчы лэземе уг ни поты…Тани со мынам пушкам улэ…Яратоно адямиос котьку пушкамы уло…Пыртэмын соос но пыраклы пыдьсамын, медаз ноку пегзе отысь…

1 южтолэзь

aino

Берлозэ секытэн поликлиникае мыныкум врач вераз — 6 мартэ монэ роддоме понозы. Плановое кесарево. Эшшо одиг пол вандылозы… Аслам потэ вал пиналме вордэме, туж трос врачен со ласянь кенешим. Италмасмы (кин ке уг тоды на) вордиськиз 4,5 кг но 60 см. Со нырысети пинал понна туж бадзымен лыдъяське. Враче пумит ке но луиз, мон весь аслэсьтым пыки — ачим и все. Вотэсысь оломар но лызыса ачим но берло врачлэсь кылзоно луи.

Айноен коты нош ик бадзым луиз, Италмасэн кадь секыт ке но ой вал, пыдъёсме шуген адзыли на. Зэмзэ ке верано, берло нуалъёсы туж жади: я изьны уг лу, я пукын шуэм сяин. Италмасэн изен азьын Эдгар Валтерлэсь покъёс сярысь веросъёссэ лыдзылим. Сыче соос зечокъёс! мусоесь! Лыдзе! Одно ик лыдзе! Италмас ымзэ усьтыса ог-кык страницазэ кылзэ вал котькуд жыт. Италмас туж кельше вылтусызъя но поклы — нырыз гинэ чатрес, нош тазьы ке учкид — лякем пок! Соос кадь ик ваньзэ тодэмез потэ, кескич но мусо, котыз но покъёслэн кадь эсьма урдиськемын. Валтерез лыдзиськод и сыче капчи сюлмад луэ, ваньзэ уродзэ мар вал нунал куспын тынад вунэтиськод…

Италмасмы вордиськиз 1 южтолэзе. 28 тулыспалэ ми быдэс нунал солань — талань ветлимы. Италмаслы кузьым, вордиськем нуналаз сиен юон басьтимы, жыт мон чуказе нуналлы салатъёс лэсьти, утялтски, корка пушез чеберъяй. Нокыче пичи шодон но ой вал кематэк мон пиналме вордо шуыса. Мамаелы серекъяса эшшо ке верай на – чуказе гинэ медам ворды, пе, вал. Уйин час котыре, значит, мон колыны выди. Ромаен Италмасъёс сур-сур коло ни вал. Учкыса ули соос шоры, малпай кыче мон шудо шуыса (Инмарлы тау но тау ваньмыз понна кин но мар вань мынам улонам). 9 часлы будильникме пукти но изьса кошкиськем. Чукна султи но таосыз али ке но коло на, часэ учки 5тэк укмыс. Пыдйылам султыса гинэ мон шоди — туннэ ми вордиськом… аххааа, ну ти монэ валады, может од но валалэ… Мынам йыры берга, пыдъёс куаляло, мар каром, мар каром? Жук позьтымтэ, шыд позьтымтэ, выж йоназ миськымтэ! мар каром? Рома, пиясько ук шуисько, пиясько! «Со гинэ,пе, уг тырмы!»- изен сяин ботьыртиз со.

Кухняе чаляк бызи: одигзэ лэсьтисько, мукетсэ. Ки куаля, ым пушкын кос. Мар мон каром? Италмаслэн вордиськем нуналыз ук — куноос вуын кулэ, маин соосты Рома секталоз-куноялоз. Натали, каллен, мур шока шуисько. Ваньмыз ас дыраз пормоз. Нырысьсэ уд пияьскы. Порай мон ваньзэ интыяз вуттыса — борщ вуэмын, жук но. Выжме йоназ миськемме уг тодиськы ни кызьы — скороез оти но возьмасько… Возьмасько… Асьме скорой со тоже нимаз верамон ик… Секытгес но секытгес луэ, Италмасме сайкати-дисяй! Осто, кыче со мынам мусо! Кыче со визьмолюк! Сыче со кескич нылы мынам, аслам сюлмысьтым ворди, яратонэн со бинямын, улонэ мынам. Туннэ со монтэк вордиськем ннуалзэ пусъёс- 2 арес пиналэлы. Адямиос 2 арес пиналзэс пичи-пичи карса нуыяло, нош мынам со быдэс апай. Ваньзэ валась но шодысь нылашка. Осто, кыче мон сое яратисько. Шуныт синкылиос вияло, туннэ Италмасэ апай луоз!

Час пала ортчиз куке скорой вуиз (сю пол жаляй Ромаен машинаен ой мыны шуса). Машинаязы сезъя, йо кадь кезьыт пуксенти. Ваизы монэ 5-ти роддоме. Мон кыкетизэ татын вордисько ини. Врачъёс татын туж золэсь. Мон пичи но уг жаляськы соослы оскиськи шуса. Час палан возьмано луоз шуиз акушерка, чидатскы, пе. Ромалэн анай-атаез вуэмын ни дорамы, сюлэмзы шуг – каждой 15 минут ортчыса жингыръяло. Анализъёсме бичазы, бордам проводъёс понизы — нылпилэсь сюлэмзэ кылдиськон вылысь. Кот висе, со проводъёсты ишкам потэ, коня можно чидан? Коня? Узиын учкизы. Ныл, 3.4 кг палан пе луоз.
Аха, малпасько. Тодисько кыче ти вес вераськоды! Италмасэз но шуиды вал 4,1 кг, нош вордиськиз- 4,5 кг! Эсьмаса, йыраз одиг ке но чепчик но оз тупалля. Весь паймыса учкизы шораз бадзым,пе. Нош мынам черектиськеме потэ вал кыче мынам нылы молодец, кыче со кужмо пинал, мон котьку тодисько вал со самой чидась пинал шуыса.

Врач вуиз монэ операционное нуыны. «Тебе сегодня повезло, анастезиолог от бога…» шуизы акушеркаос. Кыче со сыче «от бога» мон берло гинэ валай. Мон кожасько вал Италмасэн сяин огшоры наркоз карозы но мон султисько ини коня ке дыр ортчыса. Таяз мыным врач спинальная анестезия лэсьтиз: ул мугордэ пичи но уг шодиськы ни, турттид ке но уз ни пормы выретыны. Мугор из кадь катэмын йотэ: топ-топ шодиське куке котме йотыло. Нош тон быдэсак ик ваньзэ валаськод, только уг шодиськы. Адзиськод котырак кин вань. Нош котырам туж трос адями — весь мыняло мыным, нуныяло… 5 минут ик оз ортчы, дыр… черекъям куара кылиськиз. «Потерпи малыш, потерпи» — вераз врач… Тани тани со сьод йыроке мынам! Осто, кыче сьод нырысь ик вал эмоцие. Девочка, пе. Эх, кыче кема мон возьмай тонэ, Айно! Лушкемен возьмай, уйессы нуныяса, мон тоди тон таче чебер удмурт апай луод шуыса! Чупай кот йырзэ, вия ук синкыли вия! Тебе больно юало мынэсьтым, со счастлива валэктэ враче… Вуризы на монэ туж кема, кык час но вуризы на, дыр.

3,4 кг и 52 см вордиськиз Айно. Быдэс килолы апаезлэсь капчигес. Нуныосы, кудъёсыз огнуналэ вордиськиз та дуннее Соос сыче портэмесь. Сюлэм улам ик соос вал портэмесь. Айно выжыкыл дунееысь нылаш: ненег сыче, бордись, возаз весь ул. Италмасмы пи тус: кескич, йонтэм, но туж визьмо…

P.S. Операционной жок вылын кылльыку огез акушерка юаз кызьы, пе, нималоды пичидэс. Айно верай мон. Со весь кышкатскиз, одумайтесь, пока не поздно, пе. Быдэс улон, пе, пиналды курадзоз. Оскоды, оло, уд… нош мон понна пыриськиз враче: «Молодец, ти удмуртъёс, удмурт ним сетэ!» Враче мынам бигер кышномурт. Бигер кышномурт, кудиз тодэ, кин со Кузебай Герд )

Кызьы пинал улонлы дыше

Пичи дырТуннэ остановкаын сылыкум, мон туж шуш учырез синйылтӥ: кудӟем мӧйы пиосмуртъёс ваньзы азьын аракы юыса пуко. Одӥгезлы ялан мар ке но уг кельшы, самой пересь «эшсы» вылэ мыжыкъёсыныз урдӥське. Соизлы нош номыр ик ӧвӧл кадь… Ымнырыз юз вир ке но ни, пуке…

Вӧзын сылӥсь ог- куинь аръесъем нылашлы ваньмыз паймымон потӥз. Весь учке но учке. Песянаез трос пол ни солы вераз: «Надюша, не смотри туда!» Нош со лушкем, песянаезлэн пальто сьӧртӥз, бадӟым агайёс мар курадӟо валаны турртэ …

Ӝоген автобус вуиз. Та нылашъёсын ӵошен мон но пукси. Мыным та пичи ныл сокем мусо потӥз, синме ик ӧй воштыны ни бордысьтыз: лыз синмо, тӧдьы баблес йырсиё, уката ик мунё кадь дисятӥллям сое. Ваньмыныз радэ Надялэн но билет басьтэмез потэ вылэм, нош песянаез кондукторлы проезднойзэ гинэ возьматӥз…Ну бӧрдэ ук пичи адями! Кондуктор туж валась адями шедиз, Надялы со буш билет кузьмаз… Верантэм шумпотон каръяськиз пичи муртлэн ымныраз! Сое но палэнэ ӧз кельтэ!

Эшеным пичи дырмы сярысь вераськон мытылӥм: Быронтэм фантазия, мугорысь лызо- виро синякъёс, «умой» но «умойтэм» эшъёс, сӧриськем мунёос но машинаос, «мыным но сыӵе ик кулэ» -верам кылъёс, пеймытлэсь кышканмы, садикысь ческыттэм ӝук, 6 часын ӵукна сайкаммы, визьмо кариськеммы, космонавт яке президент луонмы… Мадьыса ик уд быдты. Тумошо но бон! Али гинэ валасько: соку ик котькудмылэн сюлэмшугъёс, куректонъёс вань вылэм. Нуны аслэсьтыз нимзэ вераны уг на быгат, нош кӧня ни солэн куронъёсыз! Мар гинэ солы кулэ ӧвӧл! Солэн сямен ке ӧд лэсьты? Ой, ваньмыз быриз ук соку… Кыӵе адями али асьмеос луиськом, со ведь ваньмыз пичи дырысен кылдэмын но кыдамын. Мусо, ваньзылы оскись синъёсынмы дышиськом улон шоры учкыны. Ас сямен сое валаны…

P.S. Куинь- ньыль арес дыръям гуртамы спектаклен вуылӥзы. Ӵужанаеным ми но учкыны потам. Ваньмызлы ик сцена вылын выремзы тумошо йӧтэ. Тани- тани  охотник ӟичыез ыбоз… Калык серекъя! Нош мынам ваньзылы вожпотӥз, ымдуръёсме пуктӥ, бӧрдонэ ньылонам ик пуке… Сюлмы ӧз ни чида: «Пожалуйста, эн ыб!» — вань зал тырос черектӥськи… Синкылиме кутыны ӧй ни быгат, калык азьын  ик викышъяса бордӥ. Кыӵе возьыт вал, дыр, сцена вылысь охотниклы пичи нылаш азьын… Кызьы табере ваньзэ гожтэм сценария шудоно ??